車仔教練讚港小將技術醒
「Samsung × 車路士英國暑期遊學團」喺剛過去嘅周三進入戲肉，一班足球小將正式殺入訓練營展開為期7日嘅密集式操練。呢班足球小將首日落場，已經獲當地車路士教練大讚有料，表現仲醒過班英格蘭班細路。
今次大軍進駐位於Catherham嘅寄宿學校，單計正規球場都有九個，加上設有室內泳池、醫療室同飯堂等完善配套，難怪連英冠隊伍水晶宮都問校方借場搞青訓，喺度培育明日之星。
對抗賽2:2逼和地頭龍
嚟自香港嘅一班車路士足球學校小將，每日進行三課操練，首日落場練盤扭、長傳、2對2進攻嘅時候已經技驚四座，之後喺對抗賽更以2:2賽和身形大兩個碼嘅當地青少年，就連當地車路士教練James都眼前一亮，大讚香港學員技術一流。