過隔籬睇富咸嗌餐飽
適逢前日係英超開鑼，喺史丹福橋朝聖完，當然要過附近嘅富咸主場睇開鑼戰對維拉，感受英超氣氛。
大家都係倫敦球會，一班「藍仔」都好醒目，入場前齊齊除晒車路士jacket，雖然主場嘅富咸同阿士東維拉互交白卷，坐足九十分鐘一個入波都冇，但依然無損一班足球小將嘅心情，睇住富咸嘅懷斯近門飛機同維拉前鋒戴倫賓特食詐胡都一樣嘈到拆天，同時亦期望嚟緊周六再入場睇波嘅時候，愛隊車路士能夠踢番場好波，主場砌低西布朗。
小記事隔多年重遊倫敦，估唔到再一次入場睇英超竟然係睇富咸，心諗隔幾條街就係蓮花路球場，會唔會睇昆士柏流浪仲過癮呢？答案係No！富咸球迷嗰份忠誠同熱情態度絕對令小弟佩服。
富咸fans夠忠心
富咸球迷由頭到尾都聲嘶力竭咁同班維拉fans嘈交，此起彼落嘅打氣聲同Non-Stop唱會歌簡直令小記震耳欲聾。
睇住場○比○球賽，換轉我係富咸球迷，未到九十分鐘就擔心要同人逼車提早鬆人，偏偏佢哋賽後仲留喺場外睇住電視重播，專賣店逼到水洩不通、票務處仲打晒蛇餅，球迷買定幾日後對迪尼普場歐霸盃波飛，試問香港有幾多球迷會投放咁多情感去支持愛隊呢？