車校小將玩轉藍橋

在眾多小將中，有十位係獲得贊助，「Samsung×車路士英國暑期遊學團」今年挑選咗十位嚟自基層家庭嘅小朋友，全力贊助佢哋一切開支，為青少年達成足球夢。其中司職中前場嘅喻程駿，兩隻眼加埋過千度近視，「駿仔」每次落場踢波都要佩戴隱形眼鏡，上年更因為斷腳抖足大半年，成個暑假都要坐輪椅。歷盡艱辛依然將足球放喺第一位，如今終於夢想成真，遠赴英國增廣見聞，同時繼續追尋佢嘅足球夢。

客隊更衣室「趕客」

「駿仔」同九名同學仔參加為期十三日嘅遊學團上周四展開，除咗會入場睇英超同觀光之外，仲會接受一星期嘅足球訓練，同當地小朋友拍跳進行技術交流。

大軍一到埗就掃晒London Eye、白金漢宮同塔橋等名勝，翌日佢哋晨早就出發前往車路士基地，穿過播住球迷歡呼聲同會歌錄音嘅球員通道已經夠晒興奮，跟住再落球場踩草地，一眾「藍仔」嘅亢奮情緒直情去到頂點。

原來好戲在後頭，大家殺入更衣室參觀，車路士嗰邊無論係Locker、浴室、按摩設施都一流，不過客隊更衣室配套簡陋到得人驚，冇Locker同按摩設備唔在講，最頂癮係個戰術板竟然釘喺防煙門後面，備戰同半場休息周身唔聚財，難怪作客「藍戰士」咁惡踢啦！

嚟得史丹福橋，點可以唔去埋今年六月先重新開幕嘅博物館先？呢度記載住車路士創會超過一百年嘅威水史。原來所有展品，都係由二千名車仔擁躉投票選出，名正言順係屬於「車迷」博物館。