早前由阿仙奴搞嘅酋長盃，有網友發現執法球證係香港球證吳超覺。本地波水準係唔得，但其實好多香港足球人才早就同國際接軌，香港球證抖暑期間繼續執法係好現象，應該多多支持。
香港舉辦巴克萊亞洲錦標賽，英超賽會隆重其事，搵埋英國球證執法，期間開設裁判座談會，同本地球證一齊交流，不過其實英超同港甲真係好難比較，因為比賽水準同速度實在差好遠。
睇番當日三支英超球隊嘅演出，球員往往唔錫身去到盡，攔截狠且準，有啲礙眼，但可能大家睇慣英超，唔覺得啲動作有乜問題，若然換咗係兩支港甲球隊交手，是但一方「唔收腳」嘅話，分分鐘開大片！
英超球證在港執法期間，接受訪問時咁講過，其實全世界都一樣，做得球證就要預咗畀人鬧。當面對球迷嘅責罵，佢好幽默咁答話會裝聾扮啞，因為如果球證乜嘢都上心，好難再吹落去。
吳超覺係香港五位國際球證之一，今次遠赴英國執法高水準賽事，應該有唔少得着，期待佢回歸港甲有更佳表現。