今日上演15場世界盃外圍賽亞洲區第二圈首回合賽事，除咗香港作客沙特阿拉伯，中國亦會迎戰老撾，中國同老撾嘅世界排名相差近一百位，加上國足今次精銳盡出，內地媒體認為國足可重溫上屆大勝緬甸七比○嘅舊夢，馬會嘅「讓球主客和」開中國讓四球，睇嚟一啲都唔算狠！（中央5台及廣東體育周六下午3時直播）
中國曾於四年前嘅世盃外圍賽首仗大勝緬甸七比○，今次遇上另一支東南亞球隊老撾，國足可謂志在必得，多名主將包括蒿俊閔、郜林、鄧卓翔及于海均有入選，攻力甚強，只要發揮水準，要大勝唔難。
事實上，國足及國奧隊經過多次大賽失利後，今次出戰世盃嘅決心相當強，球隊一早已拉隊到高原集訓，今次喺雲南昆明嘅高原出戰，擺明係想對手唔適應，而國足自上屆世界盃出局以來，集訓咗二百六十日，踢咗卅九場國際賽，包括早前大勝洪都拉斯三比○，可以話有充足準備。
老撾實力平庸，去年嘅東南亞錦標賽三場分組賽失咗十三球，而今年舉行嘅亞洲挑戰盃，作客中華台北都失五球，可見實力相當不濟。
另外，老撾○九年為搞東南亞運動會，以八千萬美元興建嘅國家體育場，係由中國國家開發銀行融資支持，並由雲南建工集團承建，記得今年三月，中國遠征哥斯達黎加，就係因為慶祝佢哋有份出錢興建嘅球場贈興，結果中國喺呢場「外交波」打和哥斯達黎加二比二，贏盡掌聲，究竟老撾今次會唔會回禮呢？