波男好多老友都係籃球迷，佢哋好支持本地籃球，經常入場睇波，繼早前甲一總決賽出現撲飛潮後，近期嘅超級聯賽又成為熱話，因為呢項賽事嘅外援水準好高，好多入場觀眾都讚氣氛相當好，入樽帶來嘅震撼性，同睇電視根本係兩回事，難怪咁多人身水身汗排隊買飛啦！
波男一直覺得，香港嘅籃球係有得搞嘅，因為香港真係好多人鍾意睇籃球，一場戲碼勁嘅大戰，閒閒地吸引到二千人入場，呢個數字隨時連本地波都不及，另外依家有好多企業，都願意畀錢贊助籃球，甚至組隊打埋工商盃添，相信喺搵贊助方面亦唔成問題。而且一支籃球隊嘅人數冇足球咁多，成本都冇咁貴，宣傳效益又高，波男建議籃總可參考埋足球嘅「地區概念」，如果到時甲一有區隊出現，籃球壇就真正蓬勃喇！
可惜要喺香港推廣籃球，仍要面對唔少難題，首先係配套硬件太差，依家嘅修頓體育館設施殘舊，根本唔合規格，就算麥花臣球場完成重建，但座位數量比重建前更少，球迷依然要受排隊之苦。
波男覺得，香港籃球需要好似香港足球咁，搞番個「鳳凰計劃」，進行徹底改革，近年香港隊喺國際賽嘅成績愈來愈差，再唔由頭做起嘅話，好快就會成為亞洲嘅魚腩。