荃灣第三代起風雲
生物學有所謂「隔代遺傳」，原來足球都有！昔日荃灣兄弟何國光及何國良，司職球隊左右閘傳誦一時，其中一代左閘何國良更踢到九七年四十二歲高齡才在快譯通收山，不過兩人嘅兒女並無成為職業球員，如今荃灣重組，兩人嘅孫仔同外孫同樣熱愛足球，仲遺傳咗兩兄弟嘅踢波基因。
五十八歲嘅何國光早於八五年退役，任職政府司機，其兒女並無涉足球圈，不過佢嘅十一歲外孫曾穎豪，同埋七歲孫仔何柏然卻係球隊活躍分子，至於何國良嘅十歲外孫林胤奭亦走來趁熱鬧。
三位「名將之後」順理成章加入荃灣青年軍，並理所當然由何國光、何國良親自教授球技！