話咁快2014世界盃外圍賽即將殺埋身，港足將會喺七月廿三日作客同廿八日主場火併沙特阿拉伯，近期環繞港足備戰都係負面消息，不過大戰臨近，凡事應該向好嗰方面諗，畀為港出戰嘅二十名球員多啲鼓勵。
港足備戰今屆世盃外圍賽的確唔係咁順利，例如教練臨時頂檔、練波唔齊腳，比賽場地被迫改去小西灣之類，其實場波改去小西灣只係對球迷構成不便，但對港足嚟講可能係好事，至少港足可以經常喺小西灣練波，有真正嘅主場之利。
至於練波唔齊腳同教練臨時頂檔，波總一直處於被動，球員唔肯嚟練波，波總都冇符，唔通罰佢哋停賽？
港足早前去咗北京集訓，總算安排到一個理想環境畀球員專心練波，雖然做唔到類似去年亞運前一個月去台灣踢龍騰盃咁好效果，但都好過留喺香港，日日唔知幾多人嚟練波。
港足世盃二十人名單已經敲定，代表香港出賽，無論結果係點，作為球迷應該給予支持，而呢個名單嘅最佳陣容應該係，門將葉鴻輝，後衞翟廷峯、李志豪、陳偉豪、張健峰，中場盧均宜、林嘉緯、梁振邦、郭建邦，前鋒陳肇麒、李威廉，大家一齊為佢哋加油！
波男