盧比度功夫足球撼費托
香港甲組聯賽冠軍球隊傑志，將於本月下旬舉行的巴克萊英超亞洲挑戰盃硬撼英超勁旅車路士，傑志陣中西班牙射手盧比度（Chino）將遇上同胞名將費蘭度托利斯。Chino在西甲効力期間，與「費托」碰頭都是輸多贏少，今次背負着應屆香港足球先生之名，加上他又熱愛中國功夫，故大戰前特別向香港「南拳王」鄭家豪拜師學藝，希望用Chinese KungFu幫助佢抗敵。
天分佳話咁快上手
上堂之前，Chino先要穿上鄭師傅為他準備的全套武打服裝，從未穿過唐裝衫的盧比度連扣鈕及束腰帶也有困難，終要其他人出手協助才能換裝。
正式教授時，盧比度悟性甚佳，一學便上手，他得意地說：「我細細個已經係港產功夫片嘅粉絲，但由於全情投入足球事業，所以就冇乜時間學功夫，係平時同細佬打交時，先至互相切磋吓，仲試過打甩佢隻門牙添！」盧比度去季來港時，在航班上看到《葉問》，「好鍾意呢套戲，雖然唔知佢噏乜，但前後睇咗3次以上！」
鍾意睇李小龍葉問
Chino又表示最想學的是雙節棍：「我睇過李小龍電影，佢嘅雙節棍耍得好有型啊！」雖然現場冇雙節棍，但Chino仍然十分投入，期間更搞笑地拿起纓槍當Cue棍，在地上扮「篤波」，逗得鄭師傅大笑；但其後擺起姿勢拍照時，他卻不慎打中「家豪」前額添！
不過，Chino非常感激師傅指導，「我依家邊隊都唔怕啦！對車路士都可以大勝３比０！」他眉飛色舞地說。平日也有跟朋友踢足球的「家豪」，也回應說要跟Chino學踢波。為了報答師傅，Chino更特別讓出兩張對車路士的入場券，「家豪」揚言必定會捧徒弟場。
盧比度
出生日期：1976年10月25日
年齡：34歲
現効力球會：傑志
曾効力球會：奧維多、馬略卡、華拉度列
國籍：西班牙
威水史：10/11香港足球先生、最佳足球明星、甲組聯賽冠軍