號稱中國版銀河艦隊嘅廣州恒大今年首季打中超，經過半季已經帶出，成績好之餘入座率亦全國稱冠，據報平均入場人數係四萬人！即係話若然恒大係香港球隊，大球場都唔夠坐。
一位熟悉中超現狀嘅朋友同波男講，恒大聲勢浩大，好多人直接認為只係老闆肯使錢，球市旺盛係金錢堆砌出嚟嘅現象，的確，搞波係一項大投資，冇錢萬萬不能，不過當中關鍵係錢要用得其所，而唔係每年白白投資，倒錢落鹹水海。
恒大用大量金錢砌出金鑽陣容，成績自然理想，而現時龐大嘅入場人數，唔少球迷都直接或間接受到球會資助，例如恒大推出全季套票，睇足全季主場賽事不但有大幅度折扣，仲有大量贈品例如波衫同精品等，球迷淨係收禮物都幾乎抵償番票價。
另一種就更直接，就係贊助商向名下樓盤嘅居民派贈券，每名入場球迷都有車馬費，雖然派贈券呢招香港球圈都經常做，但派飛出去係一回事，收到贈券嘅人願意入場睇波又係另一回事，原因好簡單，因為如果場波唔吸引，送飛都冇人吼啦！
球會免費甚至貼埋車馬費畀球迷睇波，票房收入點計？其實呢啲嘢香港球會都有做，只係球迷人數甚少，唔似得恒大搞到咁盛大，而且佢哋票房收入可能賺得好微，甚至負數，但由於入場數字理想，球會嘅廣告同贊助費亦相應增加，班費同贊助費都係億億聲，只要再搵多幾條大水喉，送錢畀你睇波再請埋你食叉燒飯又點話吖！
波男