索模Hidy變身宇宙最強!

究竟喺電影世界入面,要做絕世高手有乜條件?要天生異稟定骨格精奇?但原來只要學過「電影武術」,o靚模都可以好似「宇宙最強」咁打十個!著名武打明星楊盼盼開設嘅電影動作訓練創作室,「有教無類」咁無論o靚模、後生仔同3歲小朋友乜都教,佢就話「電影武術」有別於一般打打殺殺嘅武術,能夠令學員變得有型有格、提升自信,行出街都有台型啲!難怪連「索模」Hidy都拜佢為師啦!

現實中嘅甄子丹雖然唔係全宇宙最揪得,但憑藉「電影武術」就變成咗「宇宙最強」!現為「HIT HUT電影動作訓練‧創作室」揸Fit人嘅楊盼盼,就解釋一般武術同埋「電影武術」分別:「其實兩者都係源於動作,但電影動作就係透過人嘅演繹及鏡頭運用配合而成,做到『點到即止』又唔失真效果!佢哋要學嘅唔係點樣打打殺殺去贏對手,而係點樣喺鏡頭前打得好睇;我亦希望學員可以有得着、有改變,即使無鏡頭對住自己,平日行街都可以Keep住個型格,充滿自信!」

動作靚爆點到即止

「電影武術」可以話咩人都啱玩,楊盼盼除咗開設兒童班外,仲會同模特兒公司合作提供相關課程,畀啲o靚模透過電影動作嚟強化個人美態同造型,提高喺娛樂圈嘅競爭力。即將推出寫真集嘅Hidy(余曉彤)亦都係學員之一,佢就話:「之前我喺拍戲試鏡做女特工,試咗一段搶槍戲後就鍾意咗電影武術,於是就決定跟盼盼姐學囉。學咗一個月,我已經識擺一啲武打Pose,都幾型架!」

學吊威吔表演「風雷電」

採訪當日,Hidy就試玩一啲高階動作,就係電影武術最精髓所在嘅「吊威吔」。經過「威吔」幫助,估唔到弱質纖纖嘅佢,都可以使出幪面超人必殺技「風雷電」,仲鬼咁有型!Hidy表示:「好犀利呀!第一次吊威吔感覺好似識飛咁,好爽但條腰同腳好受力,都幾痛!平時睇戲見人飛來飛去好似好易,但原來點樣喺空中做唔同動作、再夾埋個表情係一樣好高學問,要做得靚簡直係難,希望將來自己可以做個有實力嘅武打演員啦!」

圖、文:司徒子文