WNBA明早上演聖安東尼奧銀星主場對紐約自由人。銀星做緊聯盟「一姐」，但近四次對自由人全敗，包括上周六作客輸75比81，今番再度碰頭，銀星未必佔到甜頭！（有線165台及now 678周六早上8時直播）
銀星季初表現出色，取得7勝2負佳績，平均每場取得90.2分，不過好睇唔代表好食，佢哋對住自由人，就有格食格味道，近四次交手全敗，而且自由人有個特性，就係美國時間星期五打波特別勁，過去九次喺周五作賽，有八次贏盤，今場隨時又令銀星陷於苦戰！