甲一男籃總冠軍今晚誕生！經過連月多場戰役，甲一男子籃球聯賽今晚在修頓室內場上演總決賽終極戰Game 5，力爭三連霸的永倫，與其近年唯一爭標「宿敵」南華，來到場數二比二的一刻已毫無退路，誓要「晒冷」出擊捧走這個本地籃壇最高榮譽！
力爭「三連霸」的永倫今屆走勢凌厲，直至總決賽Game 3之前，一路保持長勝紀錄，可惜該支「黃金戰隊」在手持二比○（賽事採五場三勝制）優勢下竟放虎歸山，被南華連追兩場成二比二，要在今晚第五場一決生死！
回看上場Game 4，南華派出劉子健、李劍煌及陳浩明三人輪流防守永倫核心人物潘志豪奏效，令該位兩屆MVP球星嘗到全場得分「捧蛋」滋味。南華教練梁達強直言今晚會食過翻尋味：「我哋會用類似方法對付永倫，只要封鎖到潘志豪同香振強喺外線發揮，南華嘅贏面會大增。況且，上場我哋大炒對手十六分，成班年輕球員信心返晒嚟，而主力羅意庭嘅心態亦成熟咗唔少，我相信南華會贏！」
對於潘志豪上仗失準，永倫領隊林植昌坦言未驚過：「球員有起伏係正常嘅，雖然阿豪上場冇得分，但我相信冇一支球隊敢唔Mark死佢，我敢保證如果稍一放鬆佢，將會付出沉重代價！」
另外，今晚頭場為甲二組賽事旭暉迎戰新青聯，勝者將有機會取得下季升上甲一席位。新青聯為增勝算，特邀內地球員李東及李鑫助陣。
冠軍 亞軍
10 永倫 南華
09 永倫 南華
08 南華 福建
07 永倫 南華
06 永倫 福建
05 南華 福建
04 南華 永倫
03 福建 南華
02 永倫 福建
01 永倫 福建
註：05年起採用季後賽賽制
7:00pm 旭 暉 Vs 新青聯（甲二組）
8:40pm 永 倫 Vs 南 華
場地：灣仔修頓室內場
票價：$50、$30（學生及老人優惠票）
售票安排：今午5時票房開售，每人限買3張