「模Art」淺尾美和撻着日本沙排熱！黎天王自創「模Art」一詞，意即「模特兒＋Artist」，日本當紅「模Art」淺尾美和正職為沙排選手，同時穿梭模界及藝能界，三線發展做到冇停手。美和健康性感形象深入民心，贏得廣告商及球迷青睞，直接帶旺當地沙排發展，被視為日本沙排Icon！
淺尾美和高中畢業後殺入模界，獲得唔少演出機會，仲半隻腳叉埋落藝能界，不時身穿水着現身電視節目，非常搶鏡。
美和08年無緣參戰京奧，但成功攝位擔任報道員，曝光率極高，09年更獲日本著名設計師桂由美睇中，有機會於巴黎時裝節行騷，桂由美當時表示：「我想搵個索腿天后着條短裙，淺尾美和係最佳人選！」憑住豐滿身材及健康膚色，呢個索爆「模Art」強勢彈起，仲出埋性感寫真狂騷「事業線」，寫真集火速售罄，人氣超勁。
淺尾美和亦成廣告寵兒，獲松下及本田等大品牌邀請擔任代言人，一個廣告收入閒閒哋過百萬，之前曾與棒球巨星松坂大輔及「日本水怪」北島康介等頂級運動員接拍廣告，齊齊變身動畫人物，賺到盆滿缽滿。
廣告：松下電器產業、本田技研工業、Suntory洋酒
電視：《Junk Sports》 寫真集：《asaomiwa》
DVD：《asaomiwa》 學歷：三重縣立津商業高校
興趣：睇戲、聽歌
25歲
1米72
33-24-34