英國單車美女彭迪爾頓（Victoria Louise Pendleton）於上屆北京奧運奪金，成功上位，一年後更豁出去拍全裸寫真，一時成為英倫男士夢中情人，獲封「史上最靚奧運單車冠軍」，明年就係倫敦奧運，呢位單車上嘅辣妹揚言奧運後先至嫁人，未婚夫Scott畀佢吊足胃口！
現年卅歲嘅彭迪爾頓出身於單車世家，佢老竇係職業單車手，仲有一個家姐同雙胞胎哥哥，差唔多學識行就踩單車，佢嘅比賽生涯於九歲開始，同哥哥一齊出戰，十六歲畀國家隊主教練個助手睇中，之後一邊接受培訓，一邊讀書讀到大學畢業。
○八年北京奧運，佢贏得個人爭先賽金牌，運動員生涯達到巔峰，但原來單車自小係佢其中一項嗜好，佢另一個喜好，就係鍾意自拍，早在京奧舉行前幾個月，英國《觀察家報》刊登佢一輯性感相片，美好身段配合甜美樣貌，英倫三島男士們為之醉倒。
作為奧運冠軍，又係靚女，彭迪爾頓在英國社會甚具影響力，呢位單車女王熱心公益，利用自己嘅名氣為社會做一件好事，就係「填坑」！
每到春天，英國瀝青路就會坑窿處處，原因係道路結冰後，水分子將瀝青結構撐破，融雪後便成坑窿，成為單車愛好者危險陷阱，調查報告指去年底英國平均每英里就有十個坑，今年春天全國就有二百萬個坑窿。
英國填坑費用高昂，填每個坑要七十鎊（約八百六十八港元），填二百萬個坑就要一億四千萬鎊（約17億港元），彭迪爾頓為修橋補路出力，以自己社會影響力爭取贊助商支持，籌募填坑經費，佢話：「我願意加入填坑行列，修好道路對騎單車者有好處。」經過彭迪爾頓一番努力，已吸引一間瀝青企業贊助成立基金，獎勵每年修復道路嘅機構。
奪得奧運金牌後獲頒ＭＢＥ嘅彭迪爾頓，一年後變本加厲，喺著名男性雜誌《ＦＨＭ》成為封面人物，將運動裝同便服全部除晒，推出全裸寫真，不過最誘人之處係佢樣貌仍然保持一貫純真，英倫麻甩佬畀佢徹底征服。
倫敦奧運好快就到，彭迪爾頓揚言要等到奧運之後，先會安排婚嫁問題，不過伊人早已心有所屬，佢同未婚夫Scott有晒默契，奧運後嫁人收山。
年齡：30歲
國籍：英國
身高：1米65
項目：場地單車
榮譽：07至10年世錦賽爭先賽金牌、08年北京奧運爭先賽金牌