儘管昨日全日落住長命雨，又有暴雨警告，不過球迷為入場睇決賽，都不惜冒雨排長龍，人龍一度多達約二百人！排頭位的菲律賓球迷Marvin和媽媽早在下午十二時就開始排隊，居港二十多年來首次入場睇甲一，而佢哋話入場係撐永倫贏波捧盃。
昨晚呢場「紅黃大戰」，南華「13號仔」陳浩明就有哥哥陳致宗Kison撐場，佢哋兩兄弟由細「打」波打到大，感情向來極佳，依家仲一齊組成男子組合「4anda（son）」闖樂壇，仲發展咗一段時間，不過對籃球始終不離不棄。
効力遊協嘅球星李偉倫昨日亦有嚟捧場，記得佢冇耐之前已將頭頂頭髮「漂」成金色，昨日更以全頭金髮示人，但佢就話到明到咗新球季，就會染番黑髮，轉吓唔同形象喎。
