八候選「佳麗」爭做保羅二世

鬥貼女子世界盃

在南非世盃成為焦點嘅德國奧博豪森水族館八爪魚保羅，於該屆賽事貼八場中八場，深受投注者愛戴！只可惜「神算子」未足三歲就喺上年「英年早逝」，令球迷大嘆惋惜。

基於「保羅效應」強勁，不少水族館都希望自家八爪魚能夠成為「保羅二世」，為水族館帶來商機，但要知道保羅係百年難得一見嘅「神獸」，其他「A貨」根本冇佢嘅「神力」。因此，德國包括來自柏林、漢諾威及慕尼黑等八間水族館已經決定親自為保羅嚴選接班人，各派出一條精英八爪魚，為即將舉行嘅女子世界盃貼波，邊個命中率最高，就成為「保羅二世」。女子世界盃將會在六月廿六日揭幕，七月十七日結束。