許煒森一晚變淑女
每年到了六月，都是Grad din（Graduation Dinner謝師宴）的季節，各畢業生為了赴會都悉心打扮、爭妍鬥麗，恍如一個小型Fashion Show！就讀傳統名校拔萃女書院中七的香港三項鐵人青年代表許煒森（Vincci），為迎接這個女生最重視的活動，已積極「備戰」，務求以最亮麗一面結束自己的中學生涯，增添最後的華麗回憶！
雖然謝師宴原意在於感謝老師多年來栽培，但不少學生都把它視作一個鬥型、鬥靚場合。Vincci解釋全因Grad din對學生來說有另一種意義：「Grad din嗰晚係成班相識多年嘅同學，喺中學生涯最後一齊慶祝嘅日子。好多女仔都會影好多相留念、留住回憶，所以先會想將自己最靚一面Show畀人睇！」
滿意膊頭唔怕露
不過，對Vincci來說，兩年前中五Grad din絕不是一個好的回憶：「仲記得中五Grad din前我整親隻手仲打埋石膏，雖然晚會前已經拆咗，但成晚就住就住一啲都唔舒服。希望今年中七Grad din唔好重蹈覆轍就好嘞！」
Vincci話由於上次已着了一條黑色珠片裙，所以今次會以鮮色為主，皆因鮮色會帶給人們開心的感覺，而她最想找到一條令自己滿意的紫色或紅色裙，所以現已積極搵衫，並且利用平日三項鐵人訓練來減肥修身，務求達至最佳效果。
談及自己這一身紫色晚裝裙的淑女打扮，Vincci直言最滿意是膊頭，皆因她不算「虎背熊腰」運動員，所以可放心穿露膊及露背的晚裝。不過，Vincci亦表示希望Grad din當晚可暫時放下運動員身份，以一位中七女生身份來度過一個值得紀念的晚上！
圖／文：司徒子文