樂比仔有個癖好，就係鍾意睇世界各地嘅足球賽事，尤其係一啲冷門聯賽，如奧地利、立陶宛甚至印尼，網上都好容易搵到直播，坐定定對住部電腦，就可以睇到世界各地嘅足球，你話幾咁爽！
以往睇直播波好矜貴，一年可能得幾場大波先有得播，但時代唔同，唔好話收費電視一周有幾十場波睇，如果你有心上網搵，真係廿四小時有直播波送上。
作為亞洲足球先驅嘅日本同南韓，就相當重視上網睇直播呢個趨勢，好似日本女子甲組聯賽，同埋南韓足總盃，都可以上網睇直播，而樂比仔記得已停辦嘅中北美洲超級聯賽，亦試過搞網上直播，對海外球迷嚟講確係非常方便。
樂比仔忽發奇想，其實本地聯賽可唔可以有樣學樣，搞網上直播呢？電視台直播一場波成本好大，而且佢哋嘅Air time亦勁貴，想佢哋一周播一場本地波實在太難，但如果係網上直播，相信成本亦會低好多，樂比仔相信一班死硬派本地波fans一定會支持，就算唔係免費，以月費形式亦應該不乏捧場客。
或者你會話，咁搞法咪冇人肯入場睇波？其實本地波依家已經冇乜人睇，就算派飛畀你，你都要考慮吓係咪花時間入場啦，與其係咁，倒不如搞網上直播，潛移默化培養吓班球迷嘅興趣仲好！