今年雖然係單數年，但夏天仍然有唔少國際賽事，包括喺墨西哥舉行兩年一度嘅十七歲以下世少盃。今屆賽事一開始就連番爆冷，兩支青訓強國阿根廷同荷蘭首輪都輸波。三屆冠軍巴西將於今晚對丹麥，小心提防吹冷風。
阿根廷小將一向早熟，喺青年大賽往往超班，但今次世少盃表現差強人意，Ｂ組首仗吞法國三蛋，阿根廷上半場已落後三球，如非對手收夠籌換邊後放軟手腳，阿根廷可能輸得仲甘。Ａ組○五年季軍荷蘭仲失禮，以○比一不敵剛果。
最受注目嘅巴西於Ｆ組首輪對丹麥，巴西曾於九七、九九及○三年奪得冠軍，○五年亦打入決賽，不過近兩屆成績都麻麻，上屆更嚴重失準於分組賽出局。
丹麥首次參賽但人腳唔錯，擁有効力阿積士嘅中場費斯查，佢身價已達一百七十萬歐元（約一千九百萬港元），初生之犢不畏虎，丹麥未必冇得打。