今日有唔少奧運外圍賽賽事舉行，日本首回合於主場迎戰科威特，日軍雖然未有召入人氣小將宇佐美貴史，但仍然人強馬壯，大軍擁有名古屋鯨魚射手永井謙佑同鹿島鹿角星級前鋒大迫勇也等，整體人腳甚強。
不過，永井謙佑於陣前受傷，今場大有機會缺陣，難免會削弱鋒力，主帥關塚隆要重整鋒線，大迫勇也將備受重用。另外，川崎前鋒門將安藤俊介尋日為球會上陣，踢完先至歸隊，難免較為疲累。科威特上圈只淘汰孟加拉，實力唔及對手，作客必定死守，或可減少失波，相信今場唔會有太多交收。