WNBA強弱懸殊之爭 暴風襲LA 吹熄火花

香港時間周一早上有場WNBA賽事,由洛杉磯火花主場迎戰西雅圖暴風,兩隊都屬於傳統勁旅,火花曾兩奪總冠軍,但對上一次封后已經係九年前,今仗遇上近七次交手均落敗嘅暴風,睇怕都難逃一敗!(now 635周一早上8時30分直播)

九七年創會嘅火花,曾經有一段風光時期,連中國名將鄭海霞都効力過,但佢哋於○一及○二年勇奪冠軍後便無以為繼,近幾季都只能擔當配角,佢哋今季陣容變化唔大,五名正選都係舊人,勝在默契甚佳,但拍埋落奪標大熱暴風,火花級數上真係差咗少少!

西雅圖暴風係上屆冠軍,今季亦保留所有主力,包括控衞舒布特、澳洲中鋒羅倫積遜同埋全能前鋒卡殊。其中羅倫積遜係常規賽及總決賽雙料MVP,呢位澳洲甜姐兒有身材,技術又全面,有佢助陣可謂信心嘅保證。

近兩季戰績一面倒

翻查兩隊對賽成績,兩隊上季喺常規賽及季後賽交手共七次,結果暴風七場贏晒,可見暴風打法上係食住火花,其實火花最輸蝕係中鋒位,因為天娜湯遜身材較矮細,而且年紀唔輕,對住羅倫積遜相信會打得好吃力,暴風有能力連續第八次擊敗對手!