雖然香港隊水準唔算高，但球圈甚為重視球員個人技術，而每個年代港隊嘅10號仔，都係當時得令嘅頂級球星，70、80年代就有胡國雄，80、90年代就有山度士，90年代後期就由譚兆偉繼承。
胡國雄係7、80年代嘅本地球壇巨星，四度當選足球先生，入球超過200個，當年佢同迪莊、海恩（阿里漢）、南寧加、連尼加賀夫等世界級外援拍檔，又曾率領精工單挑擁有馬納當拿嘅小保加。
當年隊友連尼加賀夫曾大讚年屆35歲嘅胡國雄，即使已到高齡，但仍有能力到荷甲立足，而佢當打時期嘅傳送、射門、罰球同足球智慧，年輕球迷上YouTube仍然睇到津津有味。
胡國雄退役後，山度士剛剛出道，並繼承港隊10號球衣，成為90年代港隊中場指揮官，包括92年出戰世盃5人賽，95年皇朝盃更入選賽事最佳陣容。
與胡國雄一樣，山度士防守較弱，亦由於身體較單薄而經常受傷，其中一次膝傷令他養傷一整個球季。
山度士之後，就係「東方王朝」譚兆偉嘅天下，當年好多球迷都鍾意將山度士同譚兆偉一起比較，各方面都難分高下，但自從山度士受傷，偉仔自然成為港隊10號主人，直至退出國際賽為止。