林嘉緯港隊10號仔

體院足球部解散，近年港足青訓斷層擴大，整體技術嚴重倒退，一批又一批街場球員都難以背負10號球衣，而近年港隊10號便在林嘉緯、陳耀麟與歐陽耀冲之間交替輪換。

其實林嘉緯早於上屆世盃預賽已穿上10號球衣，但近年被某領隊批評「未夠班」，更有球迷當眾呼喝他「除低件10號衫」等，令佢一度要改穿23號，受盡屈辱。

球迷叫除衫化動力

現年25歲、石硤尾街場出身嘅林嘉緯，港青年代曾於比賽中狂扭對手而受到注視，被封「緯哥」，01年以「月薪」1,500元投効花花助教招重文麾下，正式拜師學做中場指揮官，幾年過後全職踢港甲，並獲黎新祥欽點為蔣世豪接班人。

經過9年港甲磨練，林嘉緯今季僅缺席一仗之下協助傑志奪得聯賽冠軍，亦以9個入球成為華人首席射手，終可名正言順穿起港隊10號，令佢大有吐氣揚眉之感：「當日被譏未夠班，又要我除衫換冧巴，真係好大冤屈，當時有想過拂袖而去，後來諗通咗，球迷再叫我除衫就扮聽唔到，但都想踢好啲，唔好衰畀人睇。」

講到10號波衫，林嘉緯坦言有一定壓力：「雖然只係一個號碼，但着住呢件衫絕不輕鬆，因為球迷會將你同其他人比，例如搵歐陽耀冲同我比，其實佢同以前嘅我好相似，就係大家都鍾意扭波。」

因為擅射罰球而令佢一度被封為「中村嘉緯」，而最近則被網民封為「AV緯」，得到呢個名令佢非常尷尬：「都係衰唔識電腦，一次玩社交網站誤中病毒，睇完一則笑話竟然變成AV片，仲傳咗出去，第二日網民就笑我鍾意睇AV，好彩當時女朋友在場，否則水洗都唔清。」

天生70分鐘氣力靠留放

林嘉緯自問仲有好多缺點，只得70分鐘體能就係致命傷，佢話：「請教過體能專家，驗查過原來係肺活量問題，天生嘅，點練都係得70分鐘氣，不過踢波經驗多咗，留放得宜嘅話都可以捱足全場。」

林嘉緯檔案

花名 : 緯哥、中村嘉緯、AV緯

年齡 : 25歲

身高 : 1米72

位置 : 中場

効力球會 : 傑志

香港代表隊 : 9場(3球)

撰文：黃兆崑