中國隊喺今屆世盃外圍賽要爭出線，一定要盡快提升實力，最現成方法就係請外國教練，原來中國足協高層早前曾秘密斟介前意大利領隊納比，可惜慘食檸檬，不過細心再諗，其實納比正係中國隊最佳選擇，建議足協畀多啲誠意出嚟，打動納比出山。
外號「銀狐」嘅納比已經六十三歲，佢做過祖記同國米教頭，06年率領意大利奪得世盃寶座，短暫休息後復出領軍衞冕南非世盃，但係藍軍小組出局，納比亦畀球迷鬧爆。
坊間有個怪論，意大利喺南非世盃敗北，原因係意甲風平浪靜，唔似得06年捧盃嗰屆前夕，意甲爆出「電話門」假波醜聞。意大利呢班波好怪，愈多醜聞纏身成績愈勁，之前82年同30年代奪冠，國內都傳過假波醜聞。究竟係咪巧合？到依家都仲係一個謎。
點解納比係中國隊杯茶？因為中超近兩年亦都爆發假波醜聞，雖然情節同意甲醜聞有啲唔同，但影響一樣深遠，既然納比之前率領過背負假波醜聞嘅意大利捧盃，只要佢將成件事複製過嚟中國隊，相信一樣work！
至於香港隊，波總正透過獵頭公司招聘外籍教練，現時嘅港隊教練只係義工，近日曾偉忠因為有其他工作而請辭，波總就臨時搵到廖俊輝做替工，記得前年曾偉忠因病辭去南華教練一職，都係搵廖俊輝頂上，估唔到今次又係搵佢，世事嘅嘢就係咁巧合。
波男