南韓聯賽近期爆出連串假波醜聞，當局拉人封艇之餘，亦有球員被通緝，好戲陸續有來。不過睇番韓職假波案情，不外乎有人出錢賄賂球員輸波，或者球員直接向莊家落注買對手贏，然後自己故意輸波獲利。
南韓喺亞洲足壇長期佔據領導地位，國內青訓系統完善球星輩出，但都難敵假波誘惑，事關韓職一般球員薪水好低，人哋出到一年人工利誘，定力差啲都會落疊。
其實南韓聯賽有假波唔係新聞，外圍莊家早就收晒風，馬會亦都醒目唔受注，免得淪為不法之徒嘅提款機。
套用一位本地球圈人士嘅說話：「全世界都有假波！」但其實假波同國家隊表現並無直接關係，南韓有假波，但佢哋每屆世盃外圍賽都出到線，意大利都有假波，每到季尾，部分意甲賽事馬會都唔受注，但藍衫軍已經係四屆世盃冠軍得主。
中國足壇假波成風，執法部門認為，一日唔解決假波問題，中國都難以踢出好成績咁話，如果照此邏輯，南韓同意大利應該好屎波先至係，但實情係啱啱相反！
南韓今次揭發假波醜聞，實在畀中國足壇唔少啟發，令人反思點解人哋打假波又得，中國打假波又唔掂呢？