熱火在總決賽Game 1主場以92比84擊敗小牛，先拔頭籌領先1比0。小牛今場該輸得心服口服，事關賽前被譽為係球隊最大優勢嘅內線及板櫈（後備力量），竟變成負累，加上小牛明顯守唔住熱火「兩巨頭」勒邦占士及韋迪，因而在首戰飲恨。Game 2將在香港時間明早舉行。（高清翡翠台、now 635、有線165台周五早上9時直播）
熱火今場未有如傳聞般派「大帝」防守魯域斯基，反而用上「車輪戰」，由祖爾安東尼、保殊及夏士林三人輪流緊纏「德國槍」，而勒邦占士及韋迪就在場上協防。結果「車輪戰」尚算奏效，雖然「德國槍」攻入了27分，但全場18次起手僅中7球。
其實熱火自組成「超級三巨頭」後，一直為人詬病嘅地方就係內線，「三哥」保殊速度有餘、力量不足，而祖爾安東尼就身材輸蝕，籃板球往往成為球隊致命傷。不過熱火今場嘅籃板數卻遠勝對手，全場搶得46個，較小牛多10個，單係「三巨頭」就搶得28個，成為贏波關鍵。
熱火板櫈亦勝過小牛，在總決賽開打前，熱火後備球員在今季季後賽平均攻入17分，屬16支季後賽球隊最差！反觀小牛後備兵平均貢獻39.4分，表現遠勝熱火。不過小牛後備今場僅入17分，其中被視為奇兵的巴利亞8射1中最令人失望，相反熱火後備兵就貢獻27分，令小牛兩大優勢突變成負累。
勒邦占士今場手感極佳，全場16射9中得24分，其中三分球5射4中。而韋迪就在第四節射入多記關鍵球，全場則貢獻22分。
另外，第3次參與NBA總決賽嘅老將傑特，始終都解決唔到「Game 1魔咒」，生涯中3次總決賽Game 1全數落敗。不過傑特今場總算攞番個安慰獎，佢以38歲之齡，成為NBA總決賽歷史上，年紀最大嘅正選控球後衞。
本報綜合報道