大帝韋迪喜極而泣
「大帝」終勝「綠軍」！「大帝」勒邦占士尋日在最後時刻連入10分，協助熱火以97比87反勝「綠軍」塞爾特人，總成績贏4比1進身東岸決賽。今次係「大帝」NBA生涯首次在季後賽淘汰「綠軍」，難怪佢同「兄弟」韋迪賽後均喜極而泣，而占士更首度就「背叛」母會騎士一事道歉。
占士尋日都算吐氣揚眉，事關佢在Game5最後兩分鐘內連入10分，先命中兩記致命三分助熱火反先，再在關鍵時刻搶截韋斯傳球入樽，判「綠軍」死刑！貢獻咗33分嘅占士賽後同攻入34分嘅韋迪相擁而泣，全因「綠軍」一直係兩人剋星，「大帝」對上三季季後賽曾兩度遭「綠軍」淘汰，而韋迪上季亦在首圈被塞爾特人踢走。
占士首為離棄騎士道歉
「大帝」賽後表示：「終於淘汰『綠軍』！為咗勝利，我要承受巨大壓力而轉投熱火，但證明決定冇錯。我希望為上年轉會而道歉，要知道呢種機會，人生或許就只得一次而已。」今次係占士自加盟熱火後首次就轉會道歉，「大帝」之前一直堅持自己背棄騎士並冇做錯。
塞爾特人出局後，標誌住「70後」時代正式終結！事關自公牛王朝瓦解後，近12年總決賽都會見到四名「70後」代表人物高比拜仁、奧尼爾、加納特及鄧肯任何一人，四人今季都先後出局，意味NBA宣布改朝換代。
本報綜合報道