公牛挑戰13魔咒

矢志重建王朝嘅公牛終於過了第一關,戴歷羅斯(Rose)尋日帶傷上陣下貢獻最高25分,協助球隊以116比89大勝溜馬,總成績贏4比1晉級。不過,自「波神」米高佐敦離隊後,公牛13年來從未試過在季後賽突破次圈,「有刺玫瑰」羅斯仔要重建公牛王朝,先要打破魔咒!

受腳傷困擾嘅戴歷羅斯今場帶傷上陣,但似乎未有影響呢位準MVP嘅表現,羅斯仔攻入全場最高25分,且防守亦交到貨貢獻2次偷波及2記封阻,加上公牛多達6人攻入雙位數字得分,全軍發揮理想下,輕鬆以116比89大勝溜馬。今次係公牛近4年來,首度打入季後賽次圈,對手係魔術與鷹隊嘅勝方。

次圈鬥魔術或鷹隊

公牛對上一次在次圈過關要追溯到98年,亦即係「波神」米高佐敦及「禪師」積遜効力公牛嘅最後一季。所以戴歷羅斯想成為「波神接班人」,就必須要打破魔咒,領公牛闖入東岸決賽。幸好魔術與鷹隊嘅系列賽仍未結束,公牛至少獲得4日休息時間,好讓領袖戴歷羅斯爭取時間康復。

再者,無論下場對手係鷹隊定魔術,公牛在對賽上都有優勢。公牛今季曾在常規賽3戰鷹隊獲得2勝1負,兩場贏波更分別大勝對手18及33分,而輸波一役則僅負3分,反映公牛技高一籌。至於公牛今季面對魔術就獲得3勝1負佳績,所以從賽績上去分析,公牛的確大有可能在今季突破次圈,13年來首度殺入東岸決賽。

湖人領先 魔術保命

同日另一場比賽,衞冕冠軍湖人主場以106比90輕取黃蜂,總成績領先3比2。上場扭傷腳嘅高比拜仁已擺脫傷患上陣,貢獻了19分。而魔術昨日大勝鷹隊,追回較接近的2比3。

本報綜合報道