季後賽果然驚喜頻頻，灰熊領先馬刺3比1，似乎又有機會見證「老八傳奇」誕生。不過阿裕認為，首圈打得最好嘅並非灰熊，而係東岸五號種子鷹隊。
鷹隊首圈面對坐擁「NBA第一中鋒」杜域侯活嘅魔術，賽前已經預咗內線唔夠砌，因為鷹隊最弱一環就係中鋒位置。不過鷹隊打落又唔太蝕章，事關佢哋兩位中鋒柏利祖亞及積遜哥連斯一心專注防守，而進攻就交畀其他人，加上輪流以犯規戰術逼「魔獸」走上罰球線，的確畀到「魔獸」一定壓力。
此外，鷹隊肯嚴防魔術嘅外線投射，令一向以「三分雨」為傲嘅魔術，於今個系列賽命中率大幅削減。魔術今季招攬陶告魯重返球隊，目的就係希望重溫前季打入總決賽嘅美夢，可惜陶告魯表現嚴重下滑，早已難擔大旗。