馬刺奇迹翻盤4.2%

真路比利表現低迷

ＮＢＡ歷史上，只有三支常規賽排名第八球隊，季後賽首圈淘汰首號種子出局，灰熊極有機會成為一分子，因為歷史上只得4.2％球隊，能夠喺落後1比3嘅情況下翻盤，狀態低迷嘅馬刺實在欠缺反勝本錢。

馬刺低迷嘅主要原因，係主將真路比利一直受傷患困擾，今場勉強復出，但帶傷上陣影響咗表現，上陣29分鐘僅得14分。須知真路比利喺馬刺陣中非常重要，兩年前佢受傷缺陣，馬刺立即喺季後賽首圈畀小牛淘汰出局。

三巨頭死火 敵帥牙斬斬

而馬刺另外兩名主將柏加及鄧肯亦死晒火，鄧肯年紀漸大，佢喺內線面對灰熊嘅馬克加素及蘭度夫非常吃力，今仗僅得6分，以呢個成績嚟慶祝35歲生日，實在令人唏噓，而控衞柏加亦無復當年勇，下半場只得4分，全場出現7次失誤，卻僅得1次助攻，以一名控衞嚟講實在不能接受！

馬刺老將麥戴斯忍唔住話隊友嘅表現似懦夫，而教練普波維治亦對球員表現感失望：「成場波我哋班球員，就好似畀對手叉住條頸喺度比賽咁，我哋返到主場必須奮力反抗，先有機會創造奇迹。」灰熊教練賀連斯則寸爆對手：「常規賽打得好，唔代表季後賽一定成功嘅，我好有信心球隊可晉級次圈。」

本報綜合報道