高比鬧球證罰款78萬
NBA常規賽完結，西岸形勢亦塵埃落定，衞冕嘅湖人要打到加時，先作客以116比108擊敗帝王，確定西岸第二名，季後賽將與黃蜂爭入西岸四強。主將高比拜仁早前因為侮辱球證遭罰款10萬美元（約78萬港元），幸好另一主力拜林膝傷情況並唔嚴重，可以喺季後賽復出。
湖人喺常規賽煞科戰作客帝王，第三節完結時領先18分，諗住坐定粒六，點知第四節帝王大爆發，追成平手要打加時，湖人加時幾經辛苦先以8分險勝，浪費咗唔少精力，呢個西岸第二可謂得來不易。全隊得分最高係高比拜仁，佢攞咗36分及9個籃板球，中鋒拜林則休戰。
高比拜仁早前喺對馬刺嘅西岸大戰中，因辱罵球證而被罰10萬美元。NBA總裁史端表示呢種態度完全唔可以容忍，必須作出嚴懲：「雖然我明白籃球係一項充滿激情嘅運動，但我哋唔可以接受辱罵球證，今次判罰希望聯盟每一名球員都引以為鑑。」
拜林周一復出砌黃蜂
不過，湖人亦唔係冇好消息，容易受傷的男人拜林接受咗檢查後，證實傷勢無大礙，會喺香港時間周一凌晨對黃蜂嘅首場季後賽上陣，拜林係湖人二連冠嘅功臣，有佢助陣湖人衞冕機會大增。