笠臣高爾與眾童樂
曼聯兩大名宿笠臣及高爾於昨日離開香港，結束兩日慈善及公開活動，兩人離港前在港會球場教授兒童及贊助商選出嘅幸運兒踢波，笠臣話今次香港之旅替聯合國兒童基金及曼聯慈善基金籌到唔少善款，非常滿意成果，希望日後有機會幫助日本地震嘅災民，果然係充滿善心！
雖然連續兩日要進行公開活動，但手術後嘅笠臣並冇倦容，佢昨日一早就教港會12歲以下青年軍踢波，仲傳授咗曼聯獨有嘅訓練方法：「班小朋友好投入訓練，希望佢哋長大後可學以致用，曼聯青訓除咗教踢波，亦教球員做人嘅道理，所以多年來能夠出產咗咁多偉大嘅球員。」
笠臣留港時間甚短，但都有抽空與老友畢特會面，佢話畢特好享受香港嘅生活，但卻冇將早前對傑志領紅牌被逐嘅事話佢知，繼續保持幽默本色。
抽空搵咗畢特敍舊
笠臣返泰國後會準備世界盃外圍賽嘅工作，當問佢下屆世盃邊隊係熱門時，佢話佔主場之利嘅巴西機會最高。至於高爾昨日同小朋友操練時亦非常落力，仲好有耐性咁指導球員，佢話前晚要出席慈善晚宴，所以冇睇到曼聯贏富咸2比0嗰場波，但佢話曼聯贏埋呢場後，聯賽冠軍基本上係囊中物。