中國足球近年「反賭掃黑」初見成效，球員終於可以專心踢波，不過平靜日子相信唔會過得幾耐，事關內地球圈中人正研究將中超賽事開售足球彩票，意思即係以前黑市賭波係錯嘅，依家由公家合法正式開賭，將賭波收益納入正軌。
關於中超開售彩票提議，據說中國足協同彩票中心都心郁郁，由於多年來黑市賭波猖獗，一切都畀賭波集團控制晒，搞到球員「笠射自己龍門」呢啲行為都做得出，相比起黑市賭波利益，開售足球彩票只係得啖笑。
依家就唔同講法，經過「反賭掃黑」後，賭波集團勢力大減，聯賽回復正常運作，因此依家就係引入足球彩票嘅好機會，再將賭波所得收益撥歸足運發展，令中國足球加快成長。
中國足球多年來深受打假波之害，依家班足協官員個個都係反賭掃黑專家，因此今次如果拍板開售足球彩票，相信會有一系列措施出台，對聯賽球隊同球員作嚴厲規管，確保唔會再有「笠射自己龍門」事件發生，球迷對聯賽重拾信心，彩票先會受歡迎。
去年北京曾經以實驗性質推出中超首輪彩票，反應踴躍，八場中超賽事銷量達到二百三十萬人仔，若然每周聯賽彩票作全國性發行，銷量將會係天文數字，中國足球自然可以從中得益。
波男