郭慶彬：潮物放晒上身有啲亂
葉蘊妍個樣好有時代感，佢一身打扮包括Ripped Jeans牛仔褲、白色皮帶、毛毛Boot等，都係依家嘅「潮物」，可見佢平日相當留意潮流服飾，但可能佢略為貪心，將所有最流行嘅嘢放埋喺一齊就反而有啲亂咗！
睇完呢個造型之後，我會建議佢下半身可以着得簡單一啲，唔要條白色皮帶，再襯番條普通黑色牛仔褲，咁佢成個Look就會變得好好睇，因為佢單係件灰色外套就已經好靚！
另外，由於佢個樣好Sharp同上鏡，所以可以選擇番啲比較年輕、有活力嘅衫。
夏天宜着花花裙
我建議佢將來可以考慮着番啲今季夏天最流行、較Colourful嘅花花裙，絕對可以將佢最靚嘅一面展示出嚟。如果想型啲，可以加多件西裝褸，咁就不失有型又可愛！