國際足協早前宣布，2014年巴西世界盃決賽周，亞洲區維持4.5個出線席位，而外圍賽將會喺今年中開打，香港隊實力疲弱，今屆入到二十強分組賽已經好叻，至於中國方面，原來中國足協都唔係咁睇好，今屆目標只係爭取打入十強賽，對出線決賽周冇期望。
中國足球早兩年掃黑打假後元氣未復，今年初嘅亞洲盃決賽周已經睇到，國足真係唔夠砌，小組賽出局係合理賽果，再睇贏冠軍嘅係日本，攞季軍係南韓，可以理解中國足球同日韓的確有距離，想出席世界盃決賽周暫時仲未夠班。
至於中國足球仲要花幾多年時間先可以追上日韓步伐，官方仲未有定案，不過中國足協並唔係乜都唔做等運到，佢哋已將目標放喺球會級嘅賽事亞冠盃，並定下十年內稱霸亞冠嘅宏願。
中國足協呢個指標的確貼近現實，因為踢亞冠盃嘅球會，只要的起心肝重金收購外援，就可以喺短時間之內增強實力，達到亞洲頂尖級數，再花多幾年時間磨練，奪取亞冠盃並非空談。
至於國足又點處置？中國足協已放眼未來，將資源放喺國奧同國青身上，搞青訓至少要十年八年工夫，幾時先至出到成績冇人知，但至少中國足協肯腳踏實地，面對問題同去搵出解決辦法，已算係一個好開始。
波男