阿裕尋日收到一個令人興奮嘅消息，就係美籍華人球手林書豪（Jeremy）終於獲勇士從發展聯盟召回，意味球迷又有機會睇到Jeremy在NBA馳騁。
阿裕一直都有關注林書豪嘅情況，Jeremy自上月初被勇士下放至發展聯盟之後，足足一個月都在D-League比賽，但Jeremy並冇因此氣餒，反而積極地在發展聯盟強化自己，從實戰適應比賽節奏。林書豪在16場發展聯盟賽事中，平均攻入17.9分、5.6個籃板及4.7次助攻嘅全面數據，一度打入發展聯盟最佳陣容及成為每周最佳球員，因而吸引到唔少NBA球會向佢招手。
勇士眼見林書豪表現咁好，當然唔肯交易啦，並且即時收歸己用，從大角羊隊召回林書豪。其實現時勇士陣內只得史堤芬居里一名控衞，所以個人認為林書豪在下半季賽事將會擔當史堤芬居里副手，上陣時間應會提高，中港台嘅球迷肯定有更多機會欣賞呢位膽識過人嘅控衞在NBA過關斬將。