綠軍驅魔丹尼奧斯重創

落地「中頭獎」有排抖

今場擁主場之利嘅塞爾特人，開賽初段手風稍為欠順，反觀魔術領袖杜域侯活就好快入局，首節已奪得12分，助魔術搶得領先優勢。第二節發生駭人相撞，綠軍後衞馬基斯丹尼奧斯在一次單對單進攻時，頭部撞到「狂人」亞連拿斯左肩膀，倒地時頭部再撞落地，隨即動彈不得。

軍醫及後為馬基斯丹尼奧斯套上保護套固定頸部抬離場。經醫生診斷後，佢頸部及脊髓都受損，至少要缺陣一個月。

幸好受傷事件並冇令綠軍分心，眾將反而愈打愈好，最終塞爾特人在往後三節均領先對手下，以91比80贏波。綠軍今場表現最Sharp係朗度，個人攻入26分及交出7次助攻，而皮雅斯及加納特則分別貢獻18及16分。魔術方面，除杜域侯活表現合格射入28分外，其餘隊友都失準，陶告魯10射僅中1球得4分，而亞連拿斯更7射全炒捧蛋。