農曆新年假期，港人節目排到密麻麻，不過本地球圈每年到呢個時候都好忙碌，除咗大球場繼續有賀歲波，個別甲組隊亦都會安排自己嘅賀歲賽事，甚至好似大埔更會拉隊出外踢波添，至於港人最關注嘅香港隊，亦定喺年初七作客馬來西亞進行國際熱身賽，為今年中嘅世盃預選賽作準備。
波總今次拉隊作客馬來西亞嘅安排，都算係依足國際賽例，跟足手續，一個月前通知各甲組隊有呢場比賽，並喺開賽前兩星期公布入選名單，而港隊現時每周定期有一至兩課操練，因此今次到訪馬來西亞，道理上唔係打「天才波」。
不過球圈現實並唔係咁，港隊自從由去年中開始實施每周例行操練至今，幾乎未試齊人練習，球員亦係身不由己，礙於高層壓力，好多時都係「只到不操」，經常有球員到場只逗留五分鐘，向教練「招積」報到之後就離開，完全唔將港隊練兵當一回事。
自從港隊東亞運奪金，本地波再次引起政府同港人關注，去年開始港隊球員每人每月更獲體院發出六千蚊津貼，早前廣州亞運港隊打入十六強，亦充分顯示長期集訓成果，證明港足並唔係耗費社會資源嘅大食懶。
港足今年要應付奧運同世盃預選賽，可能有人認為港隊喺呢兩項賽事冇乜機會，無謂浪費精力，但足球從業員絕對唔可以有未踢先輸嘅心態，波總安排集訓同約戰熱身賽，球圈中人應該予以配合，唔好再諸多事實。
波男