今季NBA已完成一半常規賽，係時候同大家作一個小總結！毫無疑問，上半季最具話題嘅球隊必數合組「超級三巨頭」嘅熱火，不過名氣大唔代表成績佳，半季「一哥」就跑出冷門，老將如雲嘅馬刺竟然鹹魚翻生，取得39勝7負佳績傲視群雄！至於最具人氣嘅當然係「入樽戇男」比力克格芬啦！
征戰NBA僅三季嘅戴歷羅斯，今季進步神速，平均交出24.5分及8.2次助攻，數據較去季大為提升。公牛在上半季常有諾亞及布沙兩名內線主力受傷，但羅斯仔依然能單天保至尊，領公牛打到東岸第3位，上半季MVP捨佢其誰。
杜域侯活今季繼續打出高水準防守，每場平均貢獻2.2次封阻及13.4個籃板，兩項數據都躋身排行榜前5，而魔術亦因此成為其中一支平均失分較低嘅球隊。至於「蜂王」基斯保羅在上半季亦交出2.62次搶截，防守同樣出色。
無論新人定舊人，今季NBA最具人氣嘅球員必數「入樽王」比力克格芬，雖然佢外表戇直平凡，但一落場就極具娛樂性，單係半季已做出多記經典式入樽，令球迷留下深刻印象。此外，格芬平均得分及籃板都排在新秀榜首位。
近年已成功轉型為第六人嘅泰利，今季繼續恰如其分，後備落場往往交到貨。其實小牛除魯域斯基外，全隊得分第二高就要數到泰利，所以小牛冇咗呢位「第六人」都唔知點算！當然，上季最佳第六人哥羅福今季仍有好表現，同樣係呢個獎嘅競爭者之一。
雖然木狼今季仍未擺脫「魚腩」之名，繼續在下游掙扎，但球隊終於出番個似樣嘅球星，就係大前鋒路夫。呢位白人球員今季表現大躍進，平均貢獻21.6分及15.7個籃板，係上半季NBA「籃板王」，由於路夫只得廿二歲仔，所以佢同比力克格芬都被譽為美國男籃「夢幻隊」未來希望。
上季以西岸第七位完成常規賽嘅馬刺，今季意外地鹹魚翻生，創出球隊史上最佳開局及最佳半季成績，令唔少專家大跌眼鏡。其實馬刺陣容變動不大，大躍進主要多得教練普波維治「妙手回春」，催谷到後備兵如加利尼爾及佐治希爾都有能力孭飛。