自從「大帝」勒邦占士爆出「報應論」之後，霉運就接踵而至，先有「三巨頭」輪流受傷，搞到熱火成績大跌，而「大帝」女友比蓮臣嘅親表弟，日前更在美國參與生日派對時意外中彈死亡，比蓮臣與占士感震驚之餘，亦難掩傷心之情，大有可能影響「大帝」聽朝作客紐約人嘅比賽。
（now 635周五早上9時直播）
比蓮臣表弟嘅意外發生於三日前，當時佢正在辛辛那堤市參與一個私人生日派對，由於派對上有兩名青年發生爭執，及後演變成槍擊，警方在場內檢獲20至30枚彈殼，而比蓮臣表弟就因為被流彈誤中面部死亡。
據悉比蓮臣與表弟關係密切，當得知消息後顯得非常悲痛，並隨即趕往俄亥俄州，與表弟家人商討葬禮事宜。而「大帝」亦對事件感到震驚，隨後就會會合女友。
除遭受親人意外所打擊，「大帝」聽朝亦有可能要孤軍作戰，熱火教練史普斯達賽前指出，保殊現時仍未能作出跑動，所以今場肯定無緣戰紐約人，更有可能要缺席一段時間。至於近日飽受偏頭痛困擾嘅韋迪雖有參與操練，但佢要戴上保護眼鏡，以避強光。據悉韋迪仍未適應這類保護眼鏡，所以就算今場復出，亦會影響發揮。聽朝可睇高主隊紐約人一線。
本報綜合報道