今年對於大小港腳嚟講好重要，二、三月間一二年奧運外圍賽殺埋身，一四年世盃外圍賽亦喺年中開波，但眼見大小港腳齊齊負於廣東腳下，真係唔到你唔擔心。
最令人奇怪嘅係教頭「招積」教到三月約滿走人，仲話一定唔續約。與此同時，港隊經典左閘「細焯」亦突然宣布結束港隊生涯，省港盃成為其告別戰。
呢個話唔續約，嗰個又話退役，今年有奧運同世界盃兩項大賽，做乜搞到雞飛狗走，好似冇乜計劃咁？先講「招積」，波總同佢份合約只係簽一年，咁短嘅約有乜作用？三月「招積」離任期間，奧運外圍賽正在進行，踢成點都未知，新教頭上任，個主帥位籮柚都未坐暖，就要帶兵打世界盃外圍賽，要取得佳績唔容易！
至於「細焯」退役，亦暴露香港足運青訓斷層，想當年港隊左閘能人輩出，到「細焯」呢一代，一踢就十幾年，再數落去，竟然仲未有接班人，黃展鴻好過一輪又沉番，新人翟廷峯經驗不足，搵佢踢世界盃即係玩佢，依家港隊隨時要用左翼郭建邦移後踢左閘，你話係咪弊傢伙！
波男