卡塔爾亞洲盃就快開鑼，各參賽隊亮相之前，各路人馬先喺多哈上演前哨戰，就係推選國際足協副會長同國際足協執委，結果都幾大件事，做咗十六年副會長嘅南韓代表鄭夢準落台，而中國張吉龍競選執委亦「撻Q」，幾個席位由西亞、東南亞同南亞代表瓜分，東亞代表「冚晒旗」。
球迷平時睇波，未必會理國際足壇背後咁多政治嘢，就算聽到亦一笑置之，但其實足球政治影響可以好大，例如早排公布世界盃主辦權，竟然由俄羅斯同卡塔爾勝出，你就知幕後操縱咗好多嘢。
亞洲足球事實上一直分裂，分成東亞同西亞兩大陣營，雖然同屬亞洲，但係大家文化背景同地域距離實在太遠，可以話係水溝油，不過雙方喺國際足壇一直手握實權，先至互相牽制。
南韓足球喺亞洲屬頂班，亦係世盃決賽周常客，由鄭夢準坐國際足協副會長係合理不過，但偏偏今次選舉就輸咗畀約旦王子阿里•侯賽因，睇番票數結果，鄭夢準以二十比廿五落敗，僅輸五票。
至於張吉龍競選國際足協執委亦失利，兩個國際足協執委名額由泰國代表及斯里蘭卡代表瓜分，中國同日本代表落選。
東亞代表喺今次選舉全軍覆沒，影響有幾大真係無法估計，話事權落喺西亞同南亞人手上已成事實，東亞足球變咗孤兒仔，你都咪話唔弊！
波男