過去一年對兩位NBA搵食嘅中國球員嚟講，可以話係唔多順利嘅一年，火箭中鋒姚明一傷再傷，而易建聯轉投巫師後，得唔到教練桑達斯重用，近兩仗甚至要坐冷板，阿裕希望新一年阿聯可以得到更多上陣機會，為中國球員爭一口氣。
阿聯今季轉投巫師，明顯冇以往喺籃網咁多機會，自從佢上個月中對湖人受傷，復出後已遠離桑達斯嘅視線，早前對溜馬，只係打咗五分鐘，而近兩仗對黃蜂及76人，更連落場嘅機會都冇，實在令中國球迷相當失望。
其實巫師較早前將亞連拿斯交易到魔術後，隊波已失去咗靈魂，最近更有消息傳出，可以打四至五號位嘅巴特治，因紀律問題可能被巫師送走，如果屬實嘅話，證明桑達斯仍願意畀機會易建聯，對阿聯嚟講絕對係好事，否則我會建議佢轉會，尋求更多出場機會。
至於明早公鹿主場對熱火（有線62台、165台及now 678周六早上9時30分直播），阿裕認為以熱火近期嘅氣勢，應可再下一城。熱火經過季初嘅熱身，近二十仗取得十九勝一負佳績，佢哋兩日前主場先贏過公鹿十二分，即使今場作客，相信受到嘅考驗亦唔大。
前香港隊中鋒 蔡芳裕