傅家俊女友搞神秘Party賀壽Sweet又Surprise
Marco傅家俊提前賀壽，Sweet又Surprise！周六（8日）才踏入33歲的香港「桌球天王」傅家俊，前晚（周二）率先收到女友Shirley送來一份花盡心思的特別賀禮──神秘生日Party！讓Marco與近40位好友歡度快樂又窩心的晚上，昨日再帶着興奮心情登機，飛返英國準備周日（9日）展開的大師賽。
陶大宇蘇志威眾好友唱賀
Shirley上月開始籌備派對，又用多張舊相片自製生日卡，只想為男友送上驚喜，結果，當一直蒙在鼓裏的Marco被「騙」往舉行Party的私人會所，開門見到眾好友包括港隊隊友、娛圈友好陶大宇和蘇志威等齊唱生日歌時，果然開心到有點不知所措，一直傻笑及揮手，但亦不忘給女友一個甜吻、一個擁抱，還深情講句：「你真鬼馬！」氣氛溫馨、冧爆全場！
生日願望減肥成功
「呢幾日都覺得佢（Shirley）古古怪怪，但冇諗過係咁樣。好開心，真係好Surprise，好難忘！」收到不少禮物的Marco當晚心情勁靚，更High到將「壽包」笠上頭：「對上一次開生日會已經係5歲喺麥當勞嗰陣，不過都冇今次咁多人，近十年打職業賽，過生日仲經常喺英國，或者坐緊飛機呢！雖然今年『正日』都唔喺香港，但內心絕對唔寂寞！」Marco透露生日願望是身邊好友個個健康快樂，自己就減肥成功，回復至Fit身形。