今年賀歲波外隊名單確定，係兩支中超隊廣州恒大同天津泰達，仲有兩年前嚟過嘅南韓蔚山現代，三支過江龍將同南華爭盃賀新年。對於呢個戲碼，球迷反應不一，但相信今年除咗擁南躉外，廣州粉絲自由行南下度歲，亦會係今屆嘅一大特色。
記得早幾年省港盃，當時廣州隊殺上中超，大批球迷組成打氣團嚟香港捧場，為數雖然只得一百人左右，但佢哋組織甚佳，打氣口號響亮，仲組成方陣展示陣勢，睇到波男嘆為觀止，相當有J League Feel，區區一百人，但畀人嘅感覺係好似有成幾百人咁熱鬧，當年主席拜仁梁都忍唔住讚好，之後波總搞賀歲波，仲想出錢請佢哋嚟香港賀歲添！
今年賀歲波由於有廣州恒大參賽，據了解廣州粉絲團已經磨拳擦掌，準備喺新春期間組團南下睇波，喺大球場展示方陣，由於今年恒大殺上中超，佢哋嘅粉絲團規模預計會擴充到二、三千人，若然到時有估計嘅七成人殺到香港，以佢哋嘅打氣方式，大球場肯定有一番熱鬧。
至於主隊球迷有乜搞作？由於今屆由南華出戰，佢哋自己有搞球迷會，到時就要諗吓計，睇吓有乜對策應戰，免得到時畀廣州粉絲攞晒彩，做主人家嘅就冇晒「飛士」啦！
波男