眨眼又到年尾，回望2010體壇，最開心嘅係見證西班牙奪得世界盃冠軍。波男做咗球迷幾十年，一向捧開巴西，但到目前全世界只有西班牙一隊能夠踢出「森巴足球」精粹。足球，幾時都應該崇尚進攻，多入兩粒靚波先對得住球迷，依家連巴西、荷蘭都大踢「擦鞋仔波」，「鬥牛國」用純技術登上世界之巔，簡直有點「替天行道」嘅味道。
何謂足球真義，每人嘅詮釋都有不同，有人話防守足球都好睇，呢點波男冇異議，皆因呢樣嘢係冇分錯對。但波男睇波，好希望對賽雙方可以盡量發揮本身技術，入多啲靚波。大佬，依家買張波飛價錢雖然唔算好貴，但入到場齋睇個波喺空中飛來飛去，一班所謂球星連個波都未控得掂，已經唔係錢嘅問題，而係嘥緊球迷時間。
廿一世紀防守足球抬頭，名帥如莫連奴、賓尼迪斯等提倡「功利足球」，最重要目標為本，落到場理得你好唔好睇，最緊要係贏波捧盃。喺佢哋眼中當然冇錯，但同球迷真正需要卻背道而馳。物極必反，忍咗幾年終於彈出隊巴塞隆拿，哥迪奧拿、美斯、沙維、恩尼斯達，簡直就係球迷救星，佢哋「出污泥而不染」，喺呢個「亂世」敢踢進攻足球，表現出嘅華麗自信，就如萬綠叢中一點紅。
巴塞嘅成功，仲推展到西班牙，不但於球會革命成功，連國家隊賽事亦完成使命，實令波男簡有老懷安慰之嘆！
波男