睇波最緊要有「味道」，而打波最緊要就係講「態度」！馬刺今季戰績彪炳，二十七勝四負（截至昨日為止）嘅數據冠絕聯盟，背後原因就係出自一份「態度」。呢支西岸雄獅比賽態度認真，唔會以強者自居，就算對住巫師呢啲「魚腩」，都會表現得非常尊重對手，日前擊敗湖人，更加顯示佢哋遇強愈強嘅功力。
馬刺有三位球員嘅態度最令阿裕好欽佩，謝法臣甘願放棄原本可得到嘅一千五百萬美元年薪合約，改以四年三千八百萬美元嘅「低薪」留効，目的係為球隊騰出薪酬空間吸納具質素球手，呢啲咪叫做無私奉獻嘅精神囉！至於老將鄧肯不斷自我催谷，又刻意減肥，提升速度，即使做輔助角色都一樣咁積極，實在專業非常。第三位就係真路比利，佢放棄打世界男籃錦標賽，趁暑假養好傷患，睇吓佢今季至今幾咁弗，仲做埋馬刺嘅得分王添！
八卦角度亦有啟示，馬刺自九九年起逢單數年都特別旺，先後喺九九、○三、○五及○七年成為總冠軍，二○一一年聽日就到，阿裕就睇好馬刺可以繼續強勢，今季至少可以殺入西岸決賽，唔知大家又同唔同意呢？
前香港隊中鋒 蔡芳裕