今日平安夜，唔知各位讀者會點樣歡度聖誕呢？計我話，最佳節目一定係Boxing Day同班friend一齊睇波，欣賞NBA聖誕大戰。今季最具話題性嘅聖誕賽事，必屬湖人對熱火，「大帝」勒邦占士自轉投熱火後，首度與「戰神」高比拜仁正面交鋒，據悉門票早已搶購一空，甚至炒至三倍都大把人爭！（周日早上6時開賽）
阿裕今場就較為睇好作客嘅熱火，原因係爭勝動力較湖人勝一籌。唔經唔覺，湖人已經連續11年要喺聖誕節比賽，難怪「禪師」積遜同主將高比拜仁都話，已極度厭倦在聖誕打波，鬥心自然較遜。
相反熱火要用今場比賽去證明實力，首先熱火今季組成「三巨頭」後，面對一些爭標對手如塞爾特人、小牛及魔術等都輸波收場，唔少人都質疑「三巨頭」未夠料去爭標，但若然熱火能擊敗湖人，就可令批評者收口，球隊信心亦能大為提升。
永倫及前香港隊中鋒 蔡芳裕