常規賽贏到開巷 綠軍馬刺返老還童
NBA兩大「老人部隊」塞爾特人及馬刺今季「返老還童」，「綠軍」尋日憑「四大天王」主宰賽事，以84比80擊敗76人，將連勝推至14場；至於聯盟「一哥」馬刺同樣銳不可當，面對缺少王牌安東尼嘅金塊，最後一節施展「三分雨」攻勢，成功逆轉贏109比103，今季第二次嘗到10連勝！
雖然塞爾特人續缺控衞朗度，但加埋達到140歲嘅「四大天王」雷阿倫、加納特、皮雅斯及奧尼爾力足控制戰局，「綠軍」在第三節追回上半場嘅失利，第四節尾段稍微領先下，最終有驚無險贏4分，取得14連勝。四大老將今場均貢獻雙位數字得分，其中雷阿倫射入最高22分，但論整體表現則以復出後愈來愈勇嘅奧尼爾最好，個人8射5中得13分，另搶下9個籃板球及2次封阻。
塞爾特人贏波後，總成績升至23勝4負，在東岸已拋離熱火及公牛，「綠軍」現時仍有朗度、柏堅斯、謝美奧尼爾及韋斯在養傷中，若然幾位傷兵在往後時間復出，塞爾特人嘅戰力肯定更為厲害。
馬刺「三分雨」射死金塊
同日另一場大戰馬刺對金塊，由於金塊主將安東尼剛有親人離世，未能出席比賽，缺少主將下自然打得較為吃力。尤其係最後一節，馬刺邦拿連中兩球三分波打出一段10比2小高潮，其後再有真路比利及尼爾等命中三分，單節打出29比14，最後逆轉贏109比103，取得10連勝。馬刺今場「三分雨」戰術奏效，28次起手入14球，其中後備嘅尼爾就個人射入5球。
現時馬刺總成績為25勝3負，繼續在聯盟領頭，並成為NBA史上第8支打了28場賽事後，只輸3場嘅球隊。
戰果放送
鷹隊 98:84 騎士
巫師 80:87 公牛
速龍 93:115 活塞
塞爾特人 84:80 76人
紐約人 112:98 雷霆
黃蜂 105:91 籃網
木狼 107:112 爵士
馬刺 109:103 金塊
快艇 92:97 火箭
NBA賽程
時間 賽事（前者主場） 讓分
周五9:00am 魔術 Vs 馬刺 魔讓2.5分
周五11:00am 帝王 Vs 公鹿 公讓1.5分 now 678及有線165台直播
周五11:30am 太陽 Vs 熱火 熱讓6.5分 now 635及廣東體育直播